Hakarang indang hakarang apang Aku handak basarita panjang Kilau ngalingu je pantun sambang Teras tampang nambuleng luyang
Hayak batutung garu manyan raja Hatuen tingang munduk sambewa Handak nanjuri tandak sarita Pahari azzis salamat hasupa
Bapa ririn je tandak timang Tabe salamat bara pangarang Balaku hadurut patahu antang Mampisik bereng manambah penyang
Aku manabe salabih helu Dengan bisak je kayu lingu Antang patahu nayurui aku Bele ku tau je tulah sahu
Andiku azzis ujau maliti Panatau pandung je uei sigi Pintar harati ku menteng bahanyi Belum batuah hayak marazaki
Mangesah isut tamparan bahuran Bapamu asal kalimantan selatan Bagian bereng panenga tuhan Mandinu indum bawin kahayan
Are puluh nyelu mahalau jadi Kuasan tuhan ampie manjadi Indu bapa badagang hai Bajanda lewu je tumbang miri
Bapam indum je zaman huran Badagang bajudi dia tara lawam Eka sanggahan ungkup babuhan Are mandohop tundah jalahan
Haranan katahin je ampin gawi Tuah razaki sasar hadari Salenga tege siap manggapi Dumah apui balaku bagi
Jete andi ujian tuhan Uang duit pinjam pinjaman Itah mahaga baya pandehan Hatala tetep manenga jalan
Limbah jete andi ikau sakula Sampai mandinun titel sarjana Aluh lepah je harta benda Panatau ketun magun batisa
Ampin rintangan dumah mahalau Dia katawa razaki mangejau Dumah apui mampalepah panatau Tapi masih batisa je melai ikau
Bapam manenga hapam nampara Labih bara baratus juta Ampin razaki hindai hasupa Duitmu lepah hayang banaya
Jakai dia penyang mangambang Kahandak huang je tatu hiyang Kanuah bitim balanga tingang Balanga habohot je bawin ramang
Sapala bitim andi mahaga Bawin balanga akan tunggu huma Andi mandua dia sia sia Tege tuah razaki bara hatalla
Jadi mandinun garing tarantang Bapa ririn auh tandak timang Razakim belum je dia gampang Are mahaba dinu mandulang
Bapa ririn pintar harati Bajenta bajorah hayak pamasi Eka karajin tuah razaki Akan bahat lewu je tumbang miri
Manumun kesah je zaman usang Asal tamparan je tingang indang Uluh bara je lewu tehang Ngaju kaleka je tumbang nyenyang
Tarantang undeng je tuntang teweng Tuntang batu sandehen bereng Mangambang penyang sahawung menteng Sewut saritam dia tau leteng
Ikau tuh andi je punau tau Dengan kalunen bara ngawa ngaju Ampin razakim bilang ngasimbu Akan pasak danum kahayan hulu
Pintar kaharatim je jadi dinu Ikau manggunae je tau tau Dia hapam nanjaru manipu Bagawin hapam pamaju lewu
Pahari azzis ewen due sawae Bajenta bajorah pander sarita Rajin mamalus pangajan kulae Hayak manyarungan bari panginae
Andiku azzis baatei randah Dia purun nampayah uluh je susah Mudahan razakim je bakarinah Belum panjang umur hayak batuah
Iyoh nah andi je tempue jatta Hatuen balanga tarantang raja Mudahan halajur asin hatalla Badehen upun tihang banderang
Sewut saritam balaku lampang Belum barazaki baumur panjang Amun tege asin tunggal sangumang Manyegah tihang bandera panjang
Hakarang indang hakarang apang Tende helu kanderang tingang Mikeh saritangku are bajangkang Balaku ampun kakam pangarang